Tiranë, 30 Janar 2025 – Sot, Në Qendrën për Hapje dhe Dialog (COD) u zhvillua një diskutim i hapur mbi rrugën e Shqipërisë drejt anëtarësimit në Bashkimin Evropian, me pjesëmarrjen e znj. Delina Ibrahimaj, Ministër Shteti për Sipërmarrjen dhe Klimën e Biznesit, znj. Catherine Suard, Ambasadore e Francës në Shqipëri, z. Thierry Beaudet, President i Këshillit Ekonomik, Social dhe Mjedisor të Francës (KESM), z. Ardian Hackaj, Drejtues i Institutit për Bashkëpunim dhe Zhvillim (CDI), si dhe përfaqësues nga bizneset, organizatat e shoqërisë civile dhe studentë të Kolegjit të Evropës nga Kampusi i Tiranës.
Shqipëria ka vendosur një objektiv ambicioz për t’u anëtarësuar në BE deri në vitin 2030. Me dy kapituj negociatash të hapur vitin e kaluar, vendi synon të hapë kapituj të tjerë gjatë vitit 2025 dhe të mbyllë të gjithë kapitujt e negociatave deri në vitin 2027. Për të arritur këtë synim, kërkohet një agjendë reformash e kërkuar, e cila duhet të zhvillohet dhe të zbatohet brenda afatit të përcaktuar. Një dialog cilësor me partnerët ekonomikë dhe socialë është një gur themeli mbi të cilin mbështetet suksesi i këtij procesi.
Në fjalën e saj përshëndetëse, Ambasadorja e Francës në Shqipëri, znj. Catherine Suard, iu referua vizitës së Presidentit të Këshillit Ekonomik, Social dhe Mjedisor (KESM) si një pasqyrim i përkushtimit të Francës për të forcuar bashkëpunimin dypalësh, ndërsa mbështet rrugën evropiane të Shqipërisë.
Në funksion të forcimit të mëtejshëm të dialogut midis autoriteteve publike dhe organizatave të shoqërisë civile, KESM zhvilloi një mision në Shqipëri në nëntor 2024. Raporti përkatës i këtij misioni u prezantua zyrtarisht sot përpara Kryeministrit Edi Rama nga Presidenti i KESM, z. Thierry Beaudet. Në fjalën e tij kryesore, z. Beaudet prezantoi rekomandimet kryesore të raportit, të përgatitura nga KESM në konsultim të ngushtë me aktorët shqiptarë mbi skenarët e mundshëm për strukturimin e dialogut trepalësh midis qeverisë dhe aktorëve socialë. Raporti propozon krijimin e një institucioni të vetëm për të rritur efektivitetin e konsultimeve dhe për të kontribuar në mënyrë të prekshme në reformat në vazhdim.
Gjatë fjalës së tij, z. Beaudet theksoi: “Shoqëria civile e organizuar luan një rol thelbësor në forcimin e demokracisë, shtetit të së drejtës dhe besimit midis autoriteteve publike dhe qytetarëve. Raporti që i dorëzova Kryeministrit paraqet propozime për strukturimin e këtij dialogu, duke e zhvilluar atë në bashkëpunim midis organizatave të shoqërisë civile dhe autoriteteve publike.”
Duke sjellë perspektivën e qeverisë shqiptare, Ministrja e Shtetit për Sipërmarrjen dhe Klimën e Biznesit, znj. Delina Ibrahimaj, deklaroi: “. Qëllimi ynë është krijimi i një Këshilli Ekonomik, Social dhe Mjedisor në Shqipëri, një strukturë e cila do të garantojë një dialog të rregullt dhe të qëndrueshëm midis institucioneve shtetërore, sektorit privat dhe shoqërisë civile. Modeli i suksesit të KESM-së në Francë na shërben si një shembull i rëndësishëm mbi mënyrën se si mund të institucionalizojmë këtë dialog dhe ta kthejmë atë në një forcë që ndikon drejtpërdrejt në hartimin dhe zbatimin e politikave.”
Përfaqësues nga sektori privat, shoqëria civile dhe vendet anëtare të BE-së kontribuan aktivisht në diskutim, duke rikonfirmuar angazhimin e fortë për të thelluar përfshirjen qytetare dhe për të forcuar dialogun institucional, duke hapur rrugën për një proces anëtarësimi më gjithëpërfshirës dhe efektiv në BE.

Si bashkëorganizator dhe moderator i këtij eventi, CDI theksoi rëndësinë sistemike të një dialogu të tillë të strukturuar për të rritur angazhimin e qytetarëve shqiptarë në shërbim të demokracisë sociale krahas demokracisë elektorale. Gjithashtu, CDI nënvizoi mbështetjen e KESM për forcimin e marrëdhënieve institucionale dhe bashkëpunimit të Shqipërisë me 21 këshillat ekonomikë dhe socialë kombëtarë në BE. Bashkëpunimi i ngushtë i CDI me Komitetin Ekonomik dhe Social Evropian (KESE) në përgatitjen e Opinionit të KESE mbi Planin e Rritjes për Ballkanin Perëndimor, si dhe shkëmbimet e vazhdueshme për të rritur përfshirjen e shoqërisë civile shqiptare në reformat e vendit drejt anëtarësimit në BE deri në vitin 2030, janë kontribute konkrete në këtë drejtim.